Tambay

Dalawang buwan na ang nakakaraan
Nang magsimula ang sumpang sabbatical;
Labing-anim na linggo pa, aba naman!
Matira ang matibay, hanggang mabungal.

Sulit na sulit itong Gold's Gym membership,
Baka magkaroon pa nga ng abs sa pwet;
Kumpleto ang tulog, pahinga, at idlip –
'Wag lang aangal ‘pag likod ay sumakit.

Memoryado na yata ang soundtrack ng Glee,
Paulit-ulit ang tugtog sa mp3;
Palaging updated ang status sa Facebook,
‘Di nahuhuli sa pag-comment, “like” at “poke.”

Todo-todo ang pakinabang ng health card
Sa oral prophylaxis, pasta, at checkup;
Kahit na aktibo pa rin ang Cocolife,
Magamit ito’y ‘di kaylanman hinangad.

Bakasyon na noo'y mahirap makamtan,
Ngayo'y anim na buwang pagsasawaan;
Nguni't perang naipo'y baka magkulang –
Nagdarasal na sana’y ma-retrench nalang.

Bakit Maalat ang Gatas

Sangkapat ng baso'y kumukulong tubig,
Kalahati'y mula sa gripong malamig,
Isang kutsara ng Alaska powdered milk,
Tamang dami ng asukal, pampatamis.

Unang dampi ng baso sa mga labi,
Puting likido'y mainit pa nang konti,
Sunod ay higop ng kahapong masakit,
Nawalan ng lasa; ininom nang pilit.

Alaala mo'y pumasok sa 'king bibig,
Nanalaytay sa lalamunang masikip,
Tumungo sa sikmurang namimilipit,
At ngayon, katawan ko ay alumpihit.

Nilagok itong gatas na nalalabi
Nang sa dila'y may kakaibang sumagi –
Bakit maalat? tanong ko sa sarili
At pinahid ang mga luha sa pisngi.