May mata, may ilong, may dila, may tenga, may balat,
May damdamin, may pag-iisip, may angking ulirat.
Bawat letra, bawat salita, at bawat pambantas
Siya'y ganap – walang idadagdag o ibabawas.
Lahat ng linya't espasyo, kung anuman ang galaw
May sikreto, may binubulong, at may sinisigaw.
May sukat man o umaalon, siya'y may kalul'wa;
May tugma man o tumatalon, tunay na malaya.
Nandyan na s'ya bago pa man iluwal ng makata;
Walang hanggan, s'ya ang Tula, at ang Tula ay Tula.
No comments:
Post a Comment