Friday, September 24, 2010

Paikot-ikot

Tinutulak
ang barbel na kaybigat
Hinahatak,
bakal na kasalungat
Nagbababad
sa gym nang nakapikit
Hinahangad,
katawang mala-Brad Pitt.

Gaano kabigat, ilang ulit?
Hanggang ang kalamnan ba'y mapunit?


Tumatakbo,
naglalakad sa treadmill
Hingal-aso
nguni't 'di tumitigil
Nasusunog,
palamarang calories
Nahuhulog,
mapagparayang pawis.

Gaano kabilis, ilang hakbang?
Hanggang hindi s'ya natitimbuwang?


Pagkatapos,
sa bahay ay nagtungo
Sumalubong
sa kanya'y pork adobo
Humulagpos,
aliping pagtitimpi
Dinaluhong,
taba't kaning kaydami.

Gaano karami, ilang subo?
Hanggang may tutong pa sa kaldero?


Nagsisisi
dahil nabundat siya
Walang silbi
ang pagpapapawis n'ya –
Uulitin
ulit ang naulit na
Pipilitin,
sana'y 'di na madapa.

Gaano katagal, ilang inog?
Hanggang marating, dulo ng bilog?

No comments:

Post a Comment