Guro

Sa kanyang pagtuturo’t pag-aaruga
Para sa kapakanan ng ating bansa,
Nagtitiis at nagsisikhay nang lubha
Upang kabataa’y maging mahalaga.

Mapagtotoo siyang nagsusumikap
Upang kabuhaya’y matuwid nang ganap;
Butil ng karunungan, kanyang pangarap
Sa mga mag-aaral at hinaharap.

Bilang pangalawa sa mga magulang,
S’ya ri’y tagahubog ng kaugalian:
Wastong pangangaral ay inilalaan
At ipinupunla sa murang isipan.

Ginintuang kaalama’t impormasyon
Ang laging nilalaman ng bawat leksyon;
Binhing kakayahan ay pinauusbong
Nang sa karukhaan baya’y maiahon.

Ang pagiging guro’y isang katungkulan
Na sa ‘ting kalinanga’y makabuluhan;
S’ya’y tagapagsulong ng kinabukasan
Para matamo ginhawang inaasam.