Makata

Inilalarawan ang samutsaring imahinasyong
Saklaw ng isipang malikhain, pumapaimbulog;
Iginuguhit n’ya sa mukha ng mundong umiinog
Gamit ang panulat na simbulo ng buhay na handog.

Ipinapahayag ang damdamin ng kaibuturan
Maging ito’y pagmamahal, galak o pagkamuhi man;
Kanyang pluma’y lumuluha sa papel ng kapalaran
Upang iakma ang bawat kataga sa taludturan.

Ipinipinta ang naaabot ng kanyang paningin
Pati na ang umaalingawngaw sa kanyang pandinig;
Bukod sa lunti’t busilak, pinta’y may kulay itim din
Nang ito’y magsilbing salamin ng mga pusong manhid.

Isinasatitik ang pangarap na nais makamtan
Sa sulatang manipis, napupunit sa kalaunan
Nguni’t isang pamukaw-sigla ng tanang nagsisikap;
Tanging hamon sa sinuman, tagumpay ay maapuhap.